የስልጢኘ አፈ ላሊቆት ቢትረሻነይ ኡፍጃት ሁልሚ ዬድበያን ቃም የፊለከ ተዋጦት ያለቢይኮ የስልጤ ዞን ኣደዋ ቱሪዝም መምረ አቻለ!

መምራይ ባውጄይ አያም ሊዬደይማን ቃምቸ ባፊ ውርት ሰንጠለ ዋባን።

የዲን አቦትቸ፣ የቢቶ አሽር ጋር ወሻይብቸ፣ የዞን፣ ዮረደዋ የከተመ መቲንዳደሬ ፎካልቸ በትዋሰድቡይ ዴረ የኩፋቾ አሳወ ያሱይ የመምራይ ወሻይብ የናሲሪ ዶ/ር ይርዳው የስልጢኘ አፈ የብለ አፈ ተሶትም በዲባየ ሁንዱሉሌ ቁወከ ላኪሞት ቢዠ ኡፍጃት ተረሶተከ በንቀሎት ቢትከሻን ቂጨ ጊን ውጣትታንቾ አሎኔን ባሎን፡፡

በሉሌመም ሂነይ ኡፍጃተ ውጣታንቾ ያሶን ባሌ የቀደ ወጥ የታበይሙ አሽር ጋርቸ በሉሌም (የቢቶ)፣ የዲን ጂጋኛኞ፣ የመንጊስት ሴክተርቸዋ ገናበሚ ዬድበይማን ቃምቸ ደበላኔ የታበይሙይ ያፈ አማነ ፈንቸቺሬ ተበሎትም አለፋኔ የሲልጢኘ አፍ ኡንሲነ ያለቢይኮ ያጥራምቶትዋ ገናይ አፈ ያማሙቆት ሃለት፣ ያፊ ዡቦ የኣደ ቱሪዝም ቢል መጥ አሶ ይንዞት ሃለት ኒበሮተከ በሙጣሎ ተጠረራን ባሎን ወሻይቢ፡፡

ሂታ ሃለትንገ ሲረም ጢሺተ ኢቢሳነይ ተልቀረይ የቀረይዋ የጠቀለ ኢልም አለይ ቢሌነይ ቃም የባሰ ዮነኮ የነቀሉይ የመምራይ ወሻይብ ሂነይንገ ቀራን ኢሌነይ ሰብ አብዞከ ወልዲከ ሲልጢኘ ቲያትዋልኩይ ያቴሪያነይ ሃለት በዛሂር የቴራን ዡቦ ዮነኮ በሙጣሉ ተጠረራን ባሎን፡፡

ያውጄሚ የሰንጠለ ዴረ መስኒጀከ ያትኬሼቢይ ቡሪ ቀስድ ሒነይ ሚካተ ባንጨርከ መለ ለበሎትን የባሉይ ወሻቢ ዶ/ር ይርዳው ሂነይ ሚካት ቢዝ ባሶት አዘር በዴራይ ተዳባይ ዮነ ደበላኔ ሁሊሚ ዬድበያን ቃም ወጠከ ቤትከ ተዋጦት አለቢ ቲሉም አሚሬ ባሎ አዋለኮን፡፡

የሰንጠላሚ ተዳበይ ዮኑ ቃምቸ ባቡይ ባሎ በቻሎትም በልቻሎትም አኩ ጃንጎ ቢለይ ፈንቸቺሬ የባሉይኮ በንቀሎት ያፈይ ቢለ ላድ ቃም ዋቤ ያድጉያን ዡቦ ተዮን ዩሊምከ አማነ ዮነኮ፣ ያፊ መሊቅም የውን ጢፎት በኘ ኢንጅ ዮነኮዋ ላፊ መሊቅ ሌገሬ በምን ሃለት ኡግዠ አሶት ያለቢነኮ ተጅሪበ ዮሰድነቢይን ሰንጠለ ቲሉ አዋለኮን፡፡

በሰንጠለ ዴራሚ የዲን አቦትቸ፣ የቢቶ አሽር ጋር ወሻይብቸ፣ የዞ፣ ዮረደዋ የከተመ መቲንዳደሬ ፎካልቸ ተዳይ ሆኖን።