ለስልጤ ዞን ዳንገ ዮኑ በካበ ሸርቅ የሀላበ ዞን፣ በቅብል ሸርቅ-ጉራጌ ዞን፣ በገርብ ጉራጌ ዞን፣ በሸርቅ የኦሮሚየ ቀፈት፣ በካበ ሀድየ ዞንዋ በቅብል ሸርቅ ማረቆ ሉሌ ወረደ ዳንገኜኑም፡፡ የዞኒ ቡር ከተመ ወራቤ ትዮን ለሸወ ለካበገርብ አዘር 172 ኪ.ሜ ይሪቃን፡፡

የደቺ ፈትነዋ መትንዳደረኜ ተሼቀራት

የስልጤ ዞን ሁንዱሉለ 2700.04 ስ/ኪ/ሜ ፈትነ ያለይ ትዮን ቲታይ ኡስጥ ሊርሰት የዋለይ 198587.05 (165027.27 ባይድአይዶ ቢዘሩያን ሰኜዋ 33557.5 ባሬሚሰኜ የቴንዜ)፣ ለላቶ ዮናነይ 8319፣ ለላቶ አዮናነይ 4759.17፣ ለጊጨ ድጋየ የዋለይ፣ ገዎዋ ሽፎ 10646.67፣ መይዋ ሌጵሌጶ/ሾሸ/ ደቺ 29187.47 ዋ የቀሬይ 12423.72 በገነ በሉላሉሌ ሸኜ የቴንዜን፡፡ መትንዳደረኜ ተሼቀራትምከ ባ10 ወረዳዶ (ዳሎቸ፣ ሁልባራግ፣ ስልጢ፣ ሸርቅ ስልጢ፣ ላንፍሮ፣ ሚቶ፣ አልቾ ውሪሮ፣ ሳንኩረ፣ ገርብ አዘርነርት በርበሬ፣ ሸርቅ አዘርነት በርበሬ)፣ በአምስት ከተመ መትንዳደሬ (ወራቤ ከተመ፣ ቅበት ከተመ ጦረ ከተመ፤አለምገበየ ከተመ ፤ዳሎቸ ከተመሞ) የትሼቀረ ትዮን 36 የከተመ ቀበሌዋ 200 የጌ ቀበላሎ አሉይ፡፡

ኡፍተርዱለኜ ሃለትዋ የአየር ሃለት

የስልጤ ዞን ኡፍተርዱለኜ ሃለት ብዢከ ጠበ ትዮን የቀሬይ ቃም በህልቀተኜዋ ሰብ በቀበረይ ገዎ የትሼፈነ ወንደበንዋ ባያባየ/ክሬት/ ሃለት አለይ፡፡ የሸርቅ አፍሪከ ጢለ ክሬት ገርብ አዘር ጨረከ ገርብ አዘርነርት በርበሬ፣ ሸርቅ አዘርነት በርበሬዋ አልቾ ውሪሮ ወረዳዶ ገርብ አዘረ ሂንኩሙንገ በጢለ ክሬት እትረከቦነይ ስልጢ፣ ሸርቅ ስልጢ፣ ላንፍሮ፣ ሚቶ፣ ዳሎቸ፣ ሁልባራግዋ ሳንኩረ ወረዳዶ ሸርቅ አዘረ ቢደጎት ዞነይ ሆሽቴት እሲደያን፡፡ ሁንዱሉላ የዞኒ ጎትት ተ1500-3339 ሜትር ተበህር ጨምበልት ደር ትዮን በቀፈቲ ታሉ ጎትተኘ ቆታቶ የሙጎዋ የእንስላስ ቆቶ ተበሀር ጨምበልት ደር ጎትተኛይ ኤት ዬንዞን፡፡ ተዞኒ የደቺ ፈትነ ኡስጥ 1.64% ውርጭ፣ 24.6% አንሰወዋ 72.76% ወንቄላን፡፡ የዝላም ቅጨከ ትያንዚ ጎትተኛይ 1200 ሚሊ ሜትር ትዮን ህርክተኛይንገ 801 ሚሊ ሜትርን፡፡ አብዞቲ የዞኒ ኤትቸ ተማዜ ነቀለ ሰኜ ጃንጎ ባሉይ ወራርቸ ኡንሰ ዝላመ እረክቦን ትዮን ዞኒ አክቾምከ ተናሴ ደረት ነቀለ እዳረ ጃንጎ ባለይ ወክት የከርመ ዝላመ እረክባን፡፡ ጎትተኛይ ጉተኘ የሙቅነ ቅጨ 22.5 ድግሪ ሴንቲ ግሬድ እጄጃን ትዮን እርክተኛይ 10.1 ድግሪ ሴንቲ ግሬድ ሁኖተከ የሜትርዎሎጂ ከሽፍ ያቴራን፡፡

ጨለለቃቆ፣ ሚዳዶዋ ቡቃቆ

በዞኒ ለመስኖዋ ለገናም ብል ሊዊሉ ያቀትሎን ጨለለቃቆ፣ ሚዳዶዋ ቡቃቆ እትረከቦን፡፡

ጨለለቃቆ፡- ሉላሉሌ የቁርጩሜ ዝሬትቸ እትረከቡያን ቀሊ አባየ/ጡፈ/ዋ ሀረሸይጣን፣

ጨለለቃቆ፡- ዲጆ፣ ፉርፉሮ፣ ቆንቀይ፣ ዌረ፣ ጋሮሬ፣ ቦቦዶዋ ዘይወት፣

ቡቃቆ፡- መጨረፈ፣ አብጀት፣ ሙሸሼ፤ ሸሻር፤ ወኪሌ፣ ደማለ፣ ደማለ ደበይ ቢረ፣ ቀረሶ፣ ወለየ ስድስት፣ ጫንጮ፣ ጣሊቀሰ፣ አትፊድግ፣ ጉግሶዋ አንጀሌ …ገነገናም፡፡