በስልጤ ዞን ኢንበስትመንትዋ ኢንዱስትሪ ላቶ መምረ ቶጵየ ታቱት ቅልቀዬዋ ዞነኜ የኢንበስትመንት ፎረም ዴረ በወራቤ ከተመ አውጄ ተረሻን።

በመስኒጃይ ሉክተኒሙ ያሴሙይ የስልጤ ዞን ቡር አትንዳዳሪ የቢልካይ ዘይኔ የዞነይ የኢንበስትመንተ ላቶ ላሊቆት ያለነይ ቤዘ በላን ባሎን።

የአድ ባድ መሊቅ ባለዪ ሁንዱሉሌ ቤዘ ዮነኮ ያዋለኩይ የቢልካይ ዘይኔ እልታሚ ምን አለነ በበሎት ላሌኔ ኒቆት ያትኬሻነኮ አዋለኮን።

ሊልታሚ ቆማሮ ከስበተኘ ኡመት አዲዋ ቡርኒ ቲሉም አትፋሀሞን።

ያፍቴይ ለባድ መሊቅ ያትኬሻነይ የሰብ ቆት ዮነኮ ዬወዱይ ቡር አትንዳዳሪ ተኬተላኔንገ በአዝጋጊ ያለይ ሂልቀተኜ ዱኒየ ያትኬሻነምኮ አዋለኮን።

እነኒ ሱር አቅራኜኔ ትያሲ የባደኮ ፈረጃተይ አትሪግጦት ያቀትሌነይ ቲሉም አትፋሀሞን።

ብዢ ባድቸ የባደኮ ዜገ ሆኖኔ ኡመትኒሙንገ ቡሰራን የባሉይ የቢልካይ ዘይኔ እታይንገ ያለይሙይ ቤዘ ጊዝ ላሎኔ በአትባቂሮትኒሙ ዮነኮ ኤወዶን።

የሰልጤ ኡመት ማነም ባደ ሄዳኔ ሀላል ቢለከ አሻኔ ዱኒየ ኢንዞት ያቀትላነን ኡመት ባሎን። እታሚ የዞነይ ኢንበስትመንተ ላኪሞት ኡግዣርከ ወደል ዮነኮ አዋለኮን።

ኢንኩም ዞኒ አጂስ ኢመጫን ቡሰረ ተቄበሌ ላስናዶት ያቀትሌነኮ ያሻን ፈት ደቺ ያለይኮዋ ብዢ የመይ ፈሰሸ ያለይምኮ ቡር አትንዳዳሪ አዛሀሮን።

በዞኒ ያለይ ሂልቀተኜ ሺፈጊዝ የልነኩይኮዋ በከተማሞሚ ሌገሬ ያትሬሻን በለ ቤዘ ያለኮ የቢልካይ ዘይኔ አትፋሀሞን።

የባድ መሊቅ ኢትሬገጣነይ በሁልሚ ጉለንተ አቶታንቾነት የጠቀለ ጎት ቲል ዮነምኮ ጬቀሞን።

አቶታንቾነት ጎት በባለ እልቅንገ ለሰቢ ብለ ባትሪክቦት፣ ገቤ ባሊቆት፣ ገበየ ቢለቆት የአዝጋገ የኡመተሚ ፈረጃት ያትሬግጣን ባሎን።

ጉለንታይ ላጥቃቅሎት በትረሼ ጊዴ ፈየ ያንሻሽጣን ውጣት የረከቢኮ ዬወዱይ ቡር አትንዳዳሪ እልታሚ ያትኬሻን ሸፐተኜ ላቶ ኢትረሻን ዮነኮ የቢልካይ ዘይኔ አትፋሀሞን።

በገባይ አህድ ሀሰነት በሱት ባያሶን ቡሰራሮ ዬገሬም መቀጮ ኢጢሌነኮ ቡር አትንዳዳሪ አትሬገጦን።

በሉሌም በጌ አዘር ዘግ የባሉ ቡሰራሮ የጥቃቀለ ቴክኖሎጂ ለአራሺ ታሩሶትዋ ታትኒቅሎት አዘር ጎት የባለ ሚከት ያለኮ አዋለኮን።

ፋጡል ድጋየ ታቦት አዘር ያለይ ሚካት በሰመቃምከ ያለይ ወሻይብዋ ሉባም ጥሽት አጥቃቅሎት አለቢ ቲሉም አትቃጠቦን።

የስልጤ ዞን ፈረጃት ፓርቲ ቡር ወሻይብ የሙኒርቴ ነኢመ በፊለኒሙ መሹራይ ሌገሬ ያቆምራን ተጅሪበ ያትኔቅላን ወባጀ ያስቡይኮ አዋለኮን።

ተዞኒ ተጅጋኞት ነቀላኔ አውጃ ጃንጎ በጌ በከተማም በትረሼይ የላቶ ብል የቡሰራሮይ ኡግዣር ወደል ዮነኮ ወሻይብቴ አዋለኮን።

በሉሌም ኢቤዣን ሃለት ተይነብር ገቦኔ በአውጄይ ቤዘ ለጂጎት ኡግዣርኒሙ የሮሬ ሎነኮ አሀተ ኢውዶት ያትኬሻን ባሎን።

የውን በልዳሌ አኩም ብዢ ኡመት በዜግነት ኡስጥ ሊነብራነኮ ኡሃን ተዜግነት ላውጦት ቢትረሻነይ ጊዴ የቡሰራይ ኡግዣር ያትኬሻን ቲሉ አዋለኮን።

የስልጤ ዞን ኢንበስትመንትዋ ኢንዱስትሪ ላቶ መምረ ወሻይብ የፈጌሳይ መሀመድ በአሳወኒሙ የባሉኮ መንግስት የኢንበስትመንተይ ጉለንተ ላኪሞት ኢቤዣን ፖሊሲ፣ስትራቴጂዋ መመረ አወጣኔ የሻነን ባሎን።

ኢታይንገ ውጣታንቾ ዮናነኮ በሰመቃምኮ ተቅራኞኔ አሶት ያትኬሻን የባሉይ ወሻይቢ የዞነኮ እነይ ኡንገ ተኬተሌኔ ያሴን ዮነምኮ አቻሎን።

ኢንበስትመንት ለሰቢ ብለ ባትሪክቦት፣ ለአብሌ ያመጤነይ አቶተ ቢግኖት፣ የአብሌ ሽላጎ ባትሪክቦት፣ የስንቀ ተዌሻተ ባትሪግጦትዋ የመንግስተ ገቤ ጎት ባሶት የባድ ፈረጃት ያትሬግጥቡያነን ጉለንተ ባሎን።

በዞኒ ባደኜይ ኢጋኘ ተኬተላኔ የኢንበስትመንተይ ጉለንተ ላንሻሽጦት ቆማሮ ብል የትረሼኮ ያዋለኩይ የፈጌሳይ መሀመድ የቡሳረይ ተዋሳጅነት ቲደብል የመጠምኮ ጬቀሞን።

ባለፈይ አይዶ መጥ አድ በቂል አስረ ዚጠኜ ቡሰራሮ በሉላሉሌ ጉለንታቶ የሁንተ የረከቡኮ ዬወዱይ ወሻይቢ ቲትታሚ ስልሰ ፐርሰንትከ በአቶቺ ኢንዱስትሪ አዘር ዮነኮ አዛሀሮን።

ቢጵታሚ በትረሼይ ብል ለ561 ሰብቸ በአሬምነት ኢንኩምንገ ለ10,500 ሰብቸንገ በወክተኜ ብል አቲንዞት ያቀተሊኮ አትፋሀሞን።

ጉለንታይ የጠቀለ ላሶትም ቆማሮ ብል ኢትረሻን ዮነኮ ዬወዱይ የፈጌሳይ መሀመድ ሶጃት የኢንዱስትሪ ቡርደ የጠቀለ ላኪሞት ተቀፈት፣ ተዞንዋ ቶራቤ ከተመ መትንዳደር በቲጋገዞት ኢትረሻን ብል ያለኮ ኤወዶን።

ብዢ ቡሰራሮ አይምነ የትረሼይ መሹረ ተኬተላኔ ብዢ ቡሰራሮ የብሌት የገቡኮ ወሻይቢ ኤወዶን።

የውን በልዳሌ ያቡይሙይ ሸዠዋ አትቃጠባት በብል በላዋሉ 52 የኢንበስትመንት ፕሮጀክትቸ ሉላሉሌ መቀጮ የጣልቡይሙኮ የመምራይ ወሻይብ አቻሎን።

ዮባጀ ሙጀለድ በስልጤ ዞን ኢንበስትመንትዋ ኢንዱስትሪ ላቶ መምረ ወሻይብ የፈጌሳይ መሀመድ አቀረቦኔ ወባጀ አስቡያን።